Wielki Czwartek
Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, Праведнаго Судию, предает. Виждь, имений рачителю, сих ради удавление употребивша! Бежи несытыя души, Учителю таковая дерзнувшия. Иже о всех Благий, Господи, слава Тебе.
И Духови Твоему. Слава Страстем Твоим Господи! Слава долготерпению Твоему Господи!
Князи людстии собрашася на Господа и на Христа Его.
Слово законопреступное возложиша на Мя: Господи, Господи, не остави Мене.
Чувствия наша чиста Христови представим, и яко друзи Его души наша пожрем Его ради, и не попеченьми житейскими соугнетаемся, яко Иуда, но в клетех наших возопиим: Отче наш, Иже на небесех, от лукаваго избави нас.
Днесь Иуда оставляет Учителя и приемлет диавола, ослепляется страстию сребролюбия, отпадает Света омраченный: како бо можаше зрети, Светило продавый на тридесятих сребреницех? Но нам возсия Страдавый за мир. К Немуже возопиим: пострадавый и сострадавый человеком, Господи, слава Тебе.
Емшим Тя беззаконным, претерпевая, сице вопиял еси, Господи: аще и поразисте Пастыря и расточисте дванадесять овец, ученики Моя, можах вящше, нежели дванадесять легеонов представити Ангелов. Но долготерплю, да исполнятся, яже явих вам пророки Моими, безвестная и тайная: Господи, слава Тебе.
Одеяйся светом, яко ризою, наг на суде стояще, и в ланиту ударение прият от рук, ихже созда: беззаконнии же людие на Кресте пригвоздиша Господа Славы: тогда завеса церковная раздрася, солнце померче, не терпя зрети Бога досаждаема, Егоже трепещут всяческая. Тому поклонимся.
Собрание иудейское у Пилата испросиша распяти Тя, Господи: вины бо в Тебе не обретше, повиннаго Варавву свободиша, и Тебе, Праведнаго, осудиша, сквернаго убийства грех наследовавше. Но даждь им, Господи, воздаяние их, яко тщетным на Тя поучишася.
К Тебе утренюю, милосердия ради Себе истощившему не преложно и до Страстей безстрастно преклоншемуся, Слове Божий, мир подаждь ми падшему, Человеколюбче.
Столп злобы богопротивныя, божественнии отроцы обличиша: на Христа же шатающееся беззаконных соборище советует тщетная, убити поучается живот держащаго дланию: Егоже вся тварь благословит, славящи во веки.
Честнейшую Херувим и славнейшую без сравнения Серафим, без истления Бога Слова рождшую, сущую Богородицу, Тя величаем.
Разбойника благоразумного во единем часе раеви сподобил еси, Господи; и мене Древом крестным просвети и спаси мя.
Разбойника (Киевский распев)
Разбойника (Туренкова) для сопрано:
Разбойник (Туренкова) полная версия: